Өвөр Монголын нүүрсний уурхайд жолоочгүй, цахилгаан хөдөлгүүртэй 100 автомашин ажиллаж эхэлжээ

БНХАУ-ын Төрийн өмчит Huaneng Group Өвөр Монголын Өөртөө Засах Оронд байрлах “Иминь” нүүрсний уурхайд цахилгаан хөдөлгүүртэй, автомат жолоодлоготой хүнд даацын 100 автомашин ажиллуулж эхэлснээ мэдээллээ.

Ингэснээр тус уурхай нүүрстөрөгчийн ялгаралгүй, жолоочгүй, ухаалаг тээвэрлэлтийн системийг өргөн бүрэлдэхүүнтэйгээр үйл ажиллагаандаа нэвтрүүлсэн дэлхийн анхны уурхай болж байгааг онцолсон байна.

Компанийн бүтээсэн өөрөө буулгагч автомашин нь 90 тоннын даацтай, 509 киловатт/цагийн хүчин чадал бүхий цэнэг хураагууртай, -40 хүртэлх хэмийн хүйтэнд ажиллах боломжтой аж. Харин автомат ажиллагааны системийг нь Huawei компанийн “5G-Advanced” сүлжээ болон CVADCS үүлэн технологийн сүлжээнд түшиглэн хөгжүүлжээ. Ингэснээр автомашинууд нэгдсэн сүлжээнд холбогдож, уурхайн материал ачих, буулгах, тээвэрлэх ажлыг хүний оролцоогүй, хурдтай гүйцэтгэх аж.

“Иминь” уурхай нь мөн 500 Mbps-ийн хурдтай 5G-A интернэт сүлжээнд холбогдсоноороо дэлхийд анхдагч болсон юм. Тиймээс уурхайн талбайд 300 хүртэлх тооны өөрөө буулгагч автомашиныг 24 цагийн турш тасралтгүй ажиллуулах боломж бүрдсэнийг мэдээлсэн байна.

Эх сурвалж: Bloomberg TV Mongolia