Чех улсад зохион байгуулагдсан “Virtuosi per musica di pianoforte” тэмцээнд есөн настай Б.Гүен тэргүүн байр эзэлжээ

Өсвөрийн төгөлдөр хуурчдын олон улсын “Virtuosi per musica di pianoforte” тэмцээн арваннэгдүгээр сарын 24-нд Чех улсад зохион байгуулагдлаа. 

56 дахь удаагаа зохион байгуулагдсан олон улсын энэхүү уралдаанд Монгол Улсын Консерватор (МУК)-ын дөрөвдүгээр ангийн сурагч, есөн настай Б.Гүен тэргүүн байр эзэлжээ. 

Ингэснээр “Virtuosi per musica di pianoforte” тэмцээний Гран-При шагналыг анх удаа Монголоос хүртэж байгаа юм. Өсвөрийн төгөлдөр хуурч Б.Гүен Чехийн Брно хотод болох Моцартын тэмцээнд удахгүй оролцох аж. 

Б.Гүенгийн мэргэжлийн багш нь Монгол Улсын консерваторийн Мэргэжлийн төгөлдөр хуурын тэнхимийн багш Г.Оюун-Эрдэнэ “56 дахь удаагаа зохион байгуулагдаж буй энэ уралдаан чансаа өндөртэй, суралцах зүйлс ихтэй, зохион байгуулалт сайтай маш сайхан уралдаан болж өнгөрлөө” хэмээсэн юм.

Уралдааны баг бүрэлдэхүүний амжилтаас дурдвал

Т.Нямсүрэн багшийн шавь Б.Очир-Эрдэнэ гуравдугаар байр, Б.Энхсаруул тусгай шагнал, Н.Ганчимэг багшийн шавь Н.Саруул, Т.Оюу нар тусгай шагналаар шагнагджээ. Харин энэхүү уралдаанаас хамгийн том шагналыг Монгол Улсын консерваторийн дөрөвдүгээр ангийн сурагч, Г.Оюун-Эрдэнэ багшийн шавь Б.Гүен хүртсэн байна. Тэрээр уралдааны нэгдүгээр ангилалд нэгдүгээр байр эзэлж, Усти над Лабем хотын захирагчийн нэрэмжит шагнал хүртсэн юм. Энэхүү тэмцээнд 13 орны төгөлдөр хуурчид ур чадвараа сорьсон бөгөөд нийт дөрвөн ангилалтай уг уралдааны гранпри шагналыг Монголоос анх удаа ийнхүү хүртсэн байна. Уралдааныг долоон өөр улсын шүүгч нар шүүн явуулжээ.