“ХААН БАНК”-ТАЙ ХАМТРАН 500 МЯНГАН МОД ТАРИАЛНА

Өнөөдөр аймгийн Засаг дарга О.Пүрэвдорж, Байгаль орчны газрын дарга Т.Эрдэнэбаяр болон Хайрхандулаан, Тарагт сумын Засаг дарга нар Засгийн газрын хэрэгжүүлэгч агентлаг Ойн газрын дарга Б.Оюунсанаа, Хаан банкны Гүйцэтгэх захирал Р.Мөнхтуяа тэргүүтэй албаны хүмүүстэй уулзалт хийлээ.

Уулзалтаар “Тэрбум мод” үндэсний хөдөлгөөний хүрээнд Өвөрхангай аймагт 515 мянган мод тариалах талаар санал солилцож, санхүүгийн дэмжлэг үзүүлэх хамтын ажиллагааны гэрээг байгуулав.

Гэрээний хүрээнд аймгийн Онги гол дагуу 70 га талбайд навчит мод бүхий татмын ойжуулалт, Хайрхандулаан сумын Ханхөгшин хайрхны орчим 150 га талбайд шилмүүст модны бортоготой тарьцаар уулын ойжуулалт байгуулах бөгөөд мод тарих ажлыг энэ ондоо багтаан зохион байгуулна.

Мод тарих болон тарьсан модыг арчлах, хамгаалах, амьдрах чадварыг нэмэгдүүлэх ажлыг Хаан банкны сонгон шалгаруулалтаар сонгогдсон аж ахуйн нэгж байгууллага хариуцан ажиллаж, 3 жилийн дараа орон нутагт хүлээлгэн өгөх юм.

Хаан банк нь энэхүү ажлыг нийгмийн хариуцлагын хүрээнд уур амьсгалын өөрчлөлтийн нөлөөллийг бууруулах, ойн нөөцийг хамгаалж нэмэгдүүлэх, ойн сангийн доройтолд орсон талбайн экологийн тэнцвэрт байдлыг хангах, байгаль орчны хамгаалалд бодитой хувь нэмэр оруулах зорилгоор зохион байгуулж байна.

Via: Өвөрхангай аймгийн Засаг даргын Тамгын газар