Энэ онд 10,5 тэрбум төгрөгийн ипотекийн зээл олгожээ

2023 он гарсаар Өвөрхангай аймагт 122 иргэнд 10.5 тэрбум төгрөгийн ипотекийн зээл олгожээ. Одоогоор ипотекийн зээл хүссэн 17 иргэний 1.1 тэрбум төгрөгийн зээлийн эх үүсвэр шийдэгдээд байгаа бол эх үүсвэр нь хүлээгдэж байгаа 110 иргэний 10.5 тэрбум төгрөгийн зээлийн хүсэлт байгааг эх сурвалж хэллээ. Ипотекийн 3 хувийн хүүтэй зээлд тухайн орон нутагт амьдарч байгаа болон Улаанбаатар хотоос шилжин очиж байгаа иргэд хамрагдах боломжтой. Орон нутагт орон сууц худалдан авахад олгох ипотекийн дээд хэмжээ 100 сая байсныг Монголбанкны эх үүсвэрээр 150 сая болгон нэмэгдүүлсэн байна.

Мөн Засгийн газраас хэрэгжүүлж байгаа “Хот, хөдөөгийн сэргэлт” бодлогын хүрээнд орон нутагт олгох ипотекийн зээлийн хүүг 3 хувь болгон бууруулсан. 

Тодруулбал, ипотекийн зээлийн гэрээг 6 хувийн хүүтэйгээр байгуулах ч эхний гурван жилд 50 хувийг нь Засгийн газраас татаас хэлбэрээр олгох юм.