Цөмийн эрчим хүчний сэргэн мандалтад БНСУ цойлж байна

БНСУ дотооддоо өсөн нэмэгдэж буй эрчим хүчний хэрэглээ, дэлхий дахиныг шавдуулж буй шатах түлшийг халах шилжилтийг хараачилж, атомын технологийг олон арван жилийн турш эх орондоо чимээгүйхэн хөгжүүлсээр иржээ.

Сүр дуулиангүй атлаа үр ашигтай энэхүү үйлдвэрлэл өдгөө тус улсын зүүн өмнөд эрэг дагуу цэцэглэн хөгжиж, найдвартай бөгөөд ялгарал багатай эрчим хүчийг боломжийн өртгөөр, ОХУ, БНХАУ-аас хамааралгүйгээр үйлдвэрлэхийн хүслэн болсон барууны орнуудын анхаарлыг татаж байна.

2050 он гэхэд дэлхийн дулаарлын хамгийн аюултай үр нөлөөг хязгаарлахын тулд цөмийн эрчим хүчний үйлдвэрлэл одоогийнхоос гурав дахин нэмэгдэх ёстой гэж судлаачид тооцоолж байна.

Bloomberg Businessweek-ийн судалгаанаас харвал өдгөө дэлхий даяар төлөвлөгдсөн ба санаачлагдсан 400 гаруй цөмийн реакторын төслийн 43 орчим хувьд нь БНСУ гүйцэтгэгчээр шалгарах өндөр магадлалтай аж. Ингэснээр тус улс ирэх арван жилийн хугацаанд цөмийн реакторын хамгийн том экспортлогч орнуудын нэг болох юм.